2023ના વર્લ્ડ કપ ફાઇનલમાં થયેલા પરાજયથી ભાંગી પડ્યો હતો

નવી દિલ્હી, તા.૨૨, ટીમ ઈન્ડિયાના દિગ્ગજ ખેલાડી અને પૂર્વ કેપ્ટન રોહિત શર્માએ ૨૦૨૩ના ODI વર્લ્ડ કપ ફાઇનલમાં ઓસ્ટ્રેલિયા સામે હારના દુ:ખને યાદ કરીને એક મહત્વપૂર્ણ ખુલાસો કર્યો છે. રોહિતે ખુલાસો કર્યો છે કે તેણે હાર પછી નિવૃત્તિ લેવાનું પણ વિચાર્યું હતું, કારણ કે તે માનસિક અને શારીરિક રીતે સંપૂર્ણપણે થાકી ગયો હતો. રોહિત શર્માએ ૨૦૨૩ના વર્લ્ડ કપમાં કેપ્ટન તરીકે ભારતને શાનદાર શરૂઆત અપાવી હતી. અમદાવાદમાં ફાઇનલ સુધી યજમાન ભારત એક પણ મેચ હાર્યું નહોતું. સમગ્ર ટુર્નામેન્ટ દરમિયાન રોહિતે ૧૧ મેચમાં ૫૯૭ રન બનાવ્યા, સરેરાશ ૫૪.૨૭ અને લગભગ ૧૨૬ના સ્ટ્રાઇક રેટથી રન બનાવ્યા હતા. ફાઇનલમાં ભારતનો સામનો ઓસ્ટ્રેલિયા સામે થયો હતો, જેણે ભારતીય ટીમ સામે પોતાની રણનીતિ ખૂબ જ સારી રીતે અમલમાં મૂકી હતી. ભારત ૫૦ ઓવરમાં ફક્ત ૨૪૦ રન જ બનાવી શક્યું હતું. જવાબમાં ઓસ્ટ્રેલિયાએ ટ્રેવિસ હેડની ૧૨૦ બોલમાં ૧૩૭ રનની ઇનિંગને કારણે છ વિકેટ બાકી રહેતા મેચ જીતી લીધી હતી.રોહિત શર્માએ કહ્યું કે આ હાર તેના માટે વ્યક્તિગત રીતે ખૂબ જ મુશ્કેલ હતી, કારણ કે ૨૦૨૨માં કેપ્ટન બન્યા પછી તેનું એકમાત્ર લક્ષ્ય ભારતને વર્લ્ડ કપ જીત તરફ દોરી જવાનું હતું. રોહિતે કહ્યું, "દરેક વ્યક્તિ ખૂબ જ નિરાશ હતા અને અમે જે બન્યું તે જાેઈને વિશ્વાસ કરી શકતા નહોતા. મારા માટે વ્યક્તિગત રીતે તે ખૂબ જ મુશ્કેલ સમય હતો, કારણ કે મેં આ વર્લ્ડ કપમાં બધું જ લગાવી દીધું હતું, ફક્ત બે કે ત્રણ મહિના માટે નહીં, પરંતુ ૨૦૨૨માં કેપ્ટનશીપ સંભાળ્યા પછી." તેણે આગળ કહ્યું, T20 વર્લ્ડ કપ હોય કે ૨૦૨૩ ODI વર્લ્ડ કપ, મારું એકમાત્ર સ્વપ્ન ટ્રોફી જીતવાનું હતું. જ્યારે તે બન્યું નહીં, ત્યારે હું સંપૂર્ણપણે તૂટી ગયો હતો. મારા શરીરમાં કોઈ ઉર્જા બચી નહોતી. મને મારી જાતને એકઠી કરવામાં અને પાછા ફરવામાં થોડા મહિના લાગ્યા." રોહિત શર્માએ સ્વીકાર્યું કે ભલે તેણે ૨૦૨૪ T20 વર્લ્ડ કપ માટે ઝડપથી તૈયારી કરવી પડી હતી, પરંતુ હારનું દુ:ખ એટલું ઊંડું હતું કે તેને લાગ્યું કે તેની પાસે આપવા માટે કંઈ બાકી નથી. તેણે કહ્યું, "જ્યારે તમે કોઈ વસ્તુમાં એટલું બધું રોકાણ કરો છો અને પરિણામ મળતું નથી, ત્યારે આવો રિસ્પોન્સ એકદમ સ્વાભાવિક છે. મારી સાથે પણ આવું જ થયું. પણ મને એ પણ ખબર હતી કે જીવન ત્યાં સમાપ્ત થતું નથી. તે મારા માટે એક મોટો પાઠ હતો: નિરાશાનો સામનો કેવી રીતે કરવો, પોતાને ફરીથી સેટ કેવી રીતે કરવો અને નવેસરથી શરૂઆત કેવી રીતે કરવી."